ووتەی دەشتی جەمال سکرتێری فیدارسیۆنی سەراسەری پەنابەرانی عێراقی لە کۆبوونەوەی پەرلەمانی بەریتانیا کە لەلایەن جان مکدونالدەوە ڕێکخرابوو ٢٨-١٠-٢٠١٤
usr_web171_1
تشرینی دووه‌م 5, 2014
ماڵه‌وه
680 Views
داعش بەرهەمی ستراتیژی نەزمی نوێی جیهانی ئەمریکا و هاوپەیمانەکانیه‌تی
ئازایخوازان وئامادەبوانی بەرێزان!
سەرەتا بەناوی فیدراسیۆنی سەراسەری پەنابەرانی عێراقیەوە زۆر بەگەرمی بەخێرهاتنتان دەکەم و سوپاس بۆ ئاماده‌بوونتان بۆ ئەم کۆبوونەوەیەی ئەمرۆ كه به سوپاسه‌وه به‌ڕێز جۆن ماکدۆناڵ ڕێكیخستووه وە سپاسی جیرمی کۆبن کۆبن دکەم بۆ ئامادەی لەم کۆبوونەوەیەدا وه دڵنیام كه هەموتان دەیناسن كه یەکێكن لەو پەرلەمانتارە سوسیالیستانەی هەمیشە لەریزی پیشەوەی بەرگری لەئازادی و لەدژی جەنگی عیراق و ئەفگانستان و داکۆکیکار بوون لەمافەکانی پەنابەران بەگشتی و پەنابەرانی کوردو عیراقی بە تایبەتی. كاره‌كان و پشتیوانیه‌كانیان جێگای ستایشن.
هەروەها بەپێویستی دەزانم سوپاسی جین لامبیرت لە حیزبی سەوز وئەندامی پەرلەمانی ئەوروپا بکەم کە هەمیشە داکۆکی سەرسەختی لەئازادی و مافەکانی پەنابەران و ژنان كردووە و لە خۆپیشاندانەکانی دژ بە ناردنەوەی پەنابەرانی کورد و کۆنفرانسەکانی ڕێکخراوەکەمان بەشداریکردوە. هاوکات سوپاسی ووتاربێژانی ئەم شەو دەکەم.
خۆشه‌ویستانم!
هەروەک ئاگادارن دوای داگیرکردنی موسڵ و شەنگال و ژمارەیەک لە ناوچە سونینشینەکان لەلایەن گروپی تیرۆریستی داعش و دەستە و تاقمی میلیشایا سونیەکانی سەر بە ناسیونالیزمی عەرەب، کارەساتێکی گەورەی ئینسانی بەره‌وڕووی دانیشتوانی ئەو ناوچانە بووەوه. بە سەدان هەزار ئینسانی بێتاوان لەژنو مناڵ و پیروپەکەوتە ئاوارەبوون و دەیان ئینسان سەریان لەجەستەیان جیاکرایەوە وسەدان کەس بەئەسیری گوللەباران کران. کارەساتی كڕین و فرۆشتنی کچانی ئێزیدی و مەسیحییەکان، شەرمەزاریەکی گەورەی بۆ کۆمەڵگای بەشەریەتی ئەمڕۆ هیناوە. له ده‌می ڕزگاربوەکانی جەنگی داعشەوە ببیستن کە چۆن کچە کەم تەمەنەکان و ئەوانەی کە شویان نەکردووە بەدیاری دراونەتە ئەمیرەکان، دەستدرێژیان کراوەتە سەرو بەزۆر ناچاریانکردوون بێنە سەر ئاینی ئیسلام، تەنانەت هەندێک لەم کچانە لە خوێندنگایەک کۆکراونەتەوە و ڕۆژانە چەندین جار دەستدرێژیان کراوەتە سەر و جیهادی نیکاحیان لەگەڵدا کراوە. بەپێی ئەو زانیاریە سەرەتاییانەی لە لایەن گروپی ژیانەوە (كه گروپێكی ڕێكخراو و چالاكه داكۆكی له مه‌سه‌له و مافه‌كانی ژنان ئه‌كات له‌كوردستانی عێراق) بڵاو بۆتەوە “کۆی گشتی ئەوانەی ڕفێنراون ٥١٩ کچ وژن لەتەمەنی ١٣ بۆ ٧٠ ساڵ ده‌بن و کۆی گشتی منداڵی ناونوسکراو ١٩١ مندالی ساوا و تا ١٢ساڵه ”. خه‌ڵكێكی قه‌تیسما و گه‌مارۆدراو له چیای شەنگالدا بە بێ نان و ئاو، تەنها بەشێک لەوکارەساتەی شەنگال بو کە وێنەکانی نمایشی جیهانکرا و به وێنه‌ی دووباره‌بوونه‌وه‌ی كاره‌ساتی هه‌ڵه‌بجه‌یه‌كی تر، ویژدانی دنیای هه‌ژاند..
ئێستا ئەم ڕەوتە دڕندەیە ماوەی مانگێک زیاترە ئابڵوقەی سەربازی کۆبانی داوە و لە ئەنبار و هیت و ناوچەکانی دەوربەری کەرکوك له عێراق، شەرێکی ماڵوێرانكه‌ری داسەپاندوە و سەدان کەس بەدەستی ئەم ئینسان کوژانە گیانیان لێسه‌ندراوه‌ته‌وه و به هه‌زارانیش ئاواره‌بوون. رۆژ بەرۆژ مەترسیەکانی پەلکێشانی داعش بۆسەر کۆمەڵگای عێراق لەزیادبوندایە. ئه‌م هه‌لومه‌رجه هەموو ئێمە دەخاتە بەردەم نیشاندانی هەڵوێستی خێرا بەرامبەر بە ئایندەی کۆمەڵگا و چارەنوسی ئینسانی بوونمان.
بەرێزان!
داعش هێزێك نییه له گۆڕی سه‌ده تاریكه‌كانی پێشووه‌وه سه‌ری ده‌رهێنابێته‌وه. ئه‌و هێزه ئیسلامیه ڕه‌شه‌تیرۆریسته سه‌ره‌تا له‌وێوه دروست بوو كه ئه‌مریكا و هه‌ندێك له هاوپه‌یمانه‌كانی و توركیا و عه‌ره‌بستانی سعودی و قه‌ته‌ر پشتیوانی هه‌رچی هێزی دڕنده و مرۆڤكوژی ئیسلامی و نه‌ته‌وه‌په‌رستیان كرد بۆ ڕوخاندنی ڕژێمی سوریا. داعش به‌رهه‌می ئه‌و ستراتیژیه‌ی ئه‌مریكا و هاوپه‌یمانه‌كانیه‌تی و به‌وجۆره به‌هێز بووه وا ئێستاش بۆته مایه‌ی كاره‌سات بۆ ته‌واوی ناوچه‌كه.
دوای ڕوخانی ڕژێمی به‌عسیش له لایه‌ن ئه‌مریكاوه، پرۆپاگه‌نده‌ی ئه‌وه‌ی كرد كه گوایه دیموكراسی له‌عێراق و ناوچه‌كه‌دا به‌رپا ده‌كات و ئارامی و ئاسایش بۆ خه‌ڵكی عێراق دابین ده‌كات. به‌ڵام ببینن له‌و كاته‌وه تا ئێستا گێژاوی شه‌ڕی نه‌بڕاوه‌ی قه‌ومی و ئه‌تنیكی و مه‌زهه‌بی چۆن ته‌واوی كۆمه‌ڵگای لول داوه و قوربانیه‌كانی سه‌دان هه‌زاری تێپه‌ڕاندووه. به‌به‌رچاومانه‌وه لاشه‌ی خه‌ڵك چوون به هه‌وادا، به‌به‌رچاومانه‌وه مناڵانێك كه له قوتابخانه ئه‌گه‌ڕانه‌وه په‌لێكیان ئه‌په‌ری، ڕۆژانه به‌به‌رچاومانه‌وه ئه‌و كۆمه‌ڵگایه ده‌سوتێ. داعش و شه‌ڕی داعشیش دژی خه‌ڵكی عێراق و كوردستان ئه‌ڵقه‌یه‌كی ئه‌و شه‌ڕ و تێكچوونه سیاسی و كۆمه‌ڵایه‌تیه‌یه كه وه‌ك زریانێك كۆمه‌ڵگای وێران كردووه.
ئایا پێویستی ده‌كرد ئه‌و هه‌موو لاشه جێماوانه ببینرێ، ئنجا باوه‌ڕ بكرێ به‌وه‌ی كه سیاسه‌ت و ستراتیژیه‌تی ئه‌مریكا به‌رهه‌مه‌كه‌ی وێرانكاریه؟!
ئێستاش له درێژه‌ی هه‌مان ئه‌و ستراتیژیه‌ی ئه‌مریكا‌دا، دەستبردن بۆ جەنگ و کردەوەی توند و تیژی جارێکی دیکە جگە لەهێز نواندنێک لەئاستی دنیادا هیچ پەیوەندیەکی بە لەناوبردنی داعشەوە نیە، بەڵکو بۆ هەستانەوەی لاسەنگی هێزە لەئاست نەیارانی جیهانی و ناوچەییدا. هەروەک بینیمان کە چۆن لەچەند ساڵی ڕابردودا و لە جەنگی ئەفغانستاندا، قاعیدە و تاڵەبانی گەوەرکرد بەڵام لەناوی نەبرد. ئەم نمایشەی ئەمریکا و زلهێزى زیاتر کارێکه که له‌به‌رامبه‌ر جه‌مسه‌ره ئابورى و سياسى و عه‌سکه‌ريه‌کانى ديکه له جيهانى سه‌رمايه‌داريدایە، نه‌ک بۆ لەناوبردنی داعش و تیرۆریزم. له ژێر ناوی له‌ناوبردنی تیرۆریزمدا، چ تیرۆریزمێك به‌ڕێكه‌وتووه؟ هەربۆیە ئەو دۆخەی ئیستا خۆلقێنراوە لەلایەن هێزه ڕەشەکانی داعشەوە، تەنها بە بۆمبارانکردن چارەسەر ناکرێت بەڵکو ئەبێ ڕۆڵی جەماوەرو خەڵکی ئازادیخوازی جیهان و ئەم ناوچەیە لەدژی بێتەمەیدانەوە.
کۆتایهێنانو بنەبڕکردنی تيرۆريزم کارى ئێمه‌یه. کارى جوڵانەوەی ئازادیخوازان و خەڵکی کرێکار و مەحرومی کۆمەڵگا و بەشەریەتی موتەمەدینی دونیایە. کاری ئەو جوڵانەوە و هێزەیە که له‌پێناو يه‌کسانى ماف و حورمه‌تى ئينسانه‌کان و جێخستنى به‌هاى ئینسانی و ژیانێکی شایستە بەمرۆڤ، ڕۆژانە لە کارگە و گەڕەک و زانکۆ و ناوەندی شارەکاندا ناڕه‌زایه‌تی دەردەبڕێ.
ئازیزان!
بەدیلێکی جدی له ئارادایه كه ده‌توانێ دۆخه‌كه بگۆڕێت کە ئەویش هێزو ئیرادەی پۆڵاینی جەماوەرە. ئه‌مريكاو ناتۆ و ئيسلامى سياسى، نایانەویت ئەو بەدیلە سەردەربهێنێ و ميدياكانیش نایانەوێت ئەم هێزە نيشان بدەن. ئێستا ڕيزى مقاوه‌مه‌ت له‌به‌رامبه‌ر جه‌نگى تيروريسته‌كاندا له عێراق وکوردستان خەریکی خۆرێکخستن و خۆ ئامادەکردنە. خواستى وەلانانی داعش خواستێكى ئينسانی و پێشڕه‌وه و پێویستی به پشتیوانی فراوان هه‌یه.
بەرگری خەڵکی خۆڕاگری کوبانی دژی داعش کە سەرنجی هەموو دنیای ڕاکێشا جێگای پشتیوانی هەر ئینسانێکی ئازادیخواز و ئینسان دۆستە كه لایەنگری ئیرادەی خەڵک و دژی کارەسات و ماڵوێرانی و دژی ئەو دڕندە ئینسان کوژانەی ئیسلامی سیاسیە کە سەپێنەرانی یاسای کۆیلەکردنی ژن و پیاوانن، ئینسان سەربڕو نیشاندەری سەری بڕدراوی خەڵکن. نمونه‌ی خۆڕاگری و ڕاوه‌ستانه‌وه‌ی خه‌ڵكی كوبانی كه توانی هه‌زاران ئینسان لەسەربرین و ئەتککردن بپارێزێت، سەدان ژن لە ئیغتیساب بپارێزێت تاكو وەک خەڵکی شەنگالیان لی نەیەت جێگای ئەوەیە کە چاوی لێبکرێ و كۆمه‌كی بكرێ.
بەریزان!
ئێمە کە دڵمان له‌گه‌ڵ خه‌ڵکى له خوێن هه‌ڵکێشراوى یەزیدیەکان و مسیحیەکان و خەڵکی ناوچەکانی ژیر دەستی دڕندەکانی داعشە، لەپاڵیاندا ڕادەوەستین. لەگەڵ سەرەتای هاتنی ئاوارەی کوردەکانی سوریا فیدراسیۆنی ئێمە بەهاوکاری چەند گروپی ئینسانی تر گروپی هانای دروستکرد بۆ یارمەتیدان و بەهاناوەچوونی ئاوارەکان لەشاری سلیمانی. دوای داگیرکردنی موسڵ و ناوچەکانی تر لە هەنگاوی یەکەمدا توانیومانە فریای ئاوارەکان بکەوین لە ڕێگای هاوکاری دەیان لە خەڵکی ئازادیخوازەوە کۆمەکی جۆراجۆر کۆبکەینەوە بیگەیەنیینە ئاوارەکان. ئێمە لەهەولەکانمان بەردەوام دەبین بەڵام بێگومان ئەو هەوڵانە پێویستی بە پشتیوانی هاوکاری هەموو ئینسان دۆستان و ئازیخوازان هەیە لەئاستی بەریتانیاو ئەوروپادا.
بەرێزان!
ئەم کۆبوونەوەی ئەمرۆ دەتوانیت سەرەتایەک بیت بۆ دیالۆگکردن لەسەر چیکردن لەسەر مەترسیەکانی داعش وئایندەی عیراق و کوردستان و ناوچەکە لەسەر بەهاناوەهاتنی ئاوارەکانو، ئەو تراجیدیایانەی رووبەرووی ئیزیدیەکان وژنان کراوەتەوە کەتائێستا کۆمەڵگای نیو دەوڵەتی لە ئاستی پێویستدا بەرپرسیارتی لەخۆ نیشان نەداوە، لەسەر دەرسوئەزمونی خۆراگری کۆبانی بۆ رووبەرووبونەوەی داعش ودەوری ژنان ولاوان لەو بەرەنگاربوونەوەیەدا.
هاوکات داوکارم كه بەناوی بەشدار بوانی ئەم کۆبوونەوەیەوە داوا بکریت لە حکومەتی بەریتانیا و ولاتە ئەورپیەکان:
-
هەنگاوی خێرا بگیرێتە بەر بۆ یارمەتیدانی هەموو ئەو ئاوارەو و بێخانەولانانەی بە بۆنەی جەنگی داعشەوە لەشۆینو ژیانی خۆیان هەڵکەنراون بە جیا لە دین و ڕەگەزیان. بەتایبەتی کە ئێستا بەرەو وەرزی زستان دەچین و ئاوارەکان لەناو خێمەدا دەژین و ژیانیان روبەرووی مەترسی دەبێتەوە. وێنه‌ی لافاو كه تا ناو قه‌دی خێمه‌كان هاتووه و مناڵانی پێپه‌تی تیایدا ڕاوه‌ستاون، به‌شێك له‌م كاره‌ساته‌ن كه هه‌ر له ئێستاوه نیشانه‌كانی ده‌بینرێن.
-
ئەو ووڵاتانەی کە هاوکاری داعشیان کردووە، بەتایبەتی حکومەتی تورکیا نەک هەر ئەبێ سەرکۆنە بکرێن بگرە ئەبێ بەرپرس بکرێن بۆ ئەو هاوکاریە سەربازی و داراییەی کە پێشکەش بە داعشیان کردووە و لێپرسینه‌وه‌ی لێبكرێت له‌و باره‌یه‌وه.
-
داوا لە حکومەتی بەریتانیاو حکومەتەکانی ئەوروپا بکریت کە ئیزیدی و مەسیحیەکان و هەموو هەڵهاتوانی ژێر دەستی داعش بە پەنابەر قبوڵبکرێن.
-
پشتیوانی تەواو لە بەرەنگاربوونەوەی خەڵکی خۆڕاگری کۆبانی بکرێت..
-
ئەو حزبە سیاسیانەی کە لەو بارودۆخەوە گلاون کەوتوونەتە هەڵخڕاندنی هەستی ڕەگەزپەرستی و تایفی: عەرەب لە دژی کورد و بە پێچەوانەوە وە سوننی لە دژی شیعە و بە پێچەوانەوە. ئه‌نجامی ئەم سیاسەتەش بۆتە مایەی کارەسات و هەلومەرجێکی نامرۆڤانە و ڕەگەزپەرستانە لە عێراق و کوردستاندا. پێویستە فشار بخرێتە سەر پارتە سیاسیەکان بۆ کۆتایی هێنان بەو سیاسەتە.
-
هەرجۆرە هەڵسوڕان و چالاکیەک لەلایەن لایەنگرانی داعشەوە لە ئەوروپا ئەبێ قەدەغەبکرێ. ئەوەی ئەوان پیادەی ئەکەن بەشێک نییە لە ئازای بیروڕا و ئازادی هەڵسووڕانی سیاسی، بگرە بانگەشەیە بۆ چاندنی ڕق و کوشتار. بۆیە ئەبێ وەک نازیەکان تەماشا بکرێن. لە لایەکی تریشەوە، دەرکەوتنی ئەوان بارودۆخ ئەخوڵقێنێ بۆ سەر بەرزکردنەوەی گروپ و مەیلە ڕاسیست و ڕەگەزپەرستەکان لە ئەوروپادا لە دژی هەر هاوڵاتیەکی غەیرە ئەوروپی یان ئەوانەی کە بە ناو لە ووڵاتە ئیسلامیەکانەوە هاتوون.ئەمەش پشێویەک دەنێتەوە کە ئەوروپا نیەتیەتی خۆی لێ لابدات.
-
٠٠٠
سپاستان دەکەم.
ifir@hotmail.co.uk
IFIR-Ku فیدراسیۆنی سەراسەری پەنابەرانی عێراقی
