گوزاره‌ی نه‌وه‌ی دووه‌می کورد له‌هه‌نده‌ران ..

گۆرانی دۆمی ....

وه‌ک ده‌ڵێن : موزیک زمانی گه‌لانه‌ . به‌ڕاده‌ی که‌م تا زۆر هه‌مووان ده‌توانن چێژی لێ وه‌رگرن له‌هه‌رته‌مه‌نه‌ یا سه‌رده‌مێکیش جوایه‌زه‌ و گۆڕانی به‌سه‌ر دادێ ، مه‌به‌ست له‌موزیک به‌واتا گشتی یه‌که‌ی هۆنراوه و هه‌ستیار ، ئاواز و نۆته ، ئامێر و ژه‌نیار ، ‌گۆرانیبێژ و گۆرانی ڕاسته‌وخۆ بێ یا تۆمارکراوی بیستن یانیش فلیمی وێنه‌ و کلیپکراو .... تاد. به‌ڵام ئه‌وه‌ی سه‌یربوو کوڕه‌ گه‌وره‌ی تازه‌ هه‌رزه‌ی هه‌نده‌رانی زۆر ئاره‌زووی له‌گۆرانی ڕۆژئاوایی و ڕتم خێرای ده‌نگ گه‌وره‌ بوو گوێچکه‌کانی به‌وانه‌ پڕ ببوو ، هه‌موو جارێ بڵندگۆی تۆمارکه‌ره‌که‌ی ده‌نگ ده‌دایه‌ به‌تایبه‌تیش گه‌ر نائارام بووایه‌ بۆ هێورکردنه‌وه‌ی ده‌روونی و کات به‌سه‌ربردن به‌دوا تۆنی بڵند گوێچکه‌ی کاس ده‌کرد به‌و گوێ بیستی یه‌ ده‌وروبه‌ری بێزار به‌ڵام خۆی بێنی ده‌شکا ئۆخه‌ی ده‌کرد. که‌م گوێ ی له‌گۆرانی کوردی ڕاده‌گرت زۆربه‌یانی وه‌کو یه‌ک ئاوازی خاوی مۆنۆمۆ ده‌هاته‌ به‌ر گوێ له‌گه‌ڵ لێدانی چالاکی دڵ و باری ده‌روونی ئه‌و باش نه‌ده‌گونجا . کاتێ له‌ناو ماشێن کاسێتێکی خسته‌ سه‌ر تۆمارکه‌ره‌که‌ باوکی گرژبوو وای زانی دیسان هه‌ر هه‌مان مۆسیقای ڕمبه‌ ڕمب و هاوار هاواری قیژه‌ی ڕۆژئاوایی یه‌ ، که‌چی گۆرانیه‌کان گۆرانی شایی و ئاهه‌نگی بوک گواستنه‌وه‌ی کورده‌واری‌ بوون ئه‌وانه‌ی تێکسته‌کانی زاره‌کی ساده‌ی میللین یا وه‌ک لای خۆمان ده‌ڵێن : گۆرانی دۆمی . به‌ندی به‌دوای یه‌ک ڕێکخراو یا وشه‌ی به‌یه‌ک گونجاو ڕاسته‌وخۆ ئاماده‌کرێن ده‌رده‌بڕێن جۆره‌ به‌هره‌یه‌که‌ توانای هونه‌ری خۆی ده‌وێ . باوک پێکه‌نی و پرسی : کوڕم ئه‌وه‌ چی یه‌ تا ئێستا گوێت له‌گۆرانی کوردی ڕانه‌ده‌گرت ؟ ئێستاش وا چوویه‌ ناو ئه‌و گۆرانییانه‌ ! کوڕه‌ پێکه‌نی وتی : نازانم ئه‌وانه‌ گۆرانی خۆش و خێران به‌س ده‌نگی دمبگه‌که‌ی زۆر زۆر خۆشه‌ ! به‌ڕاده‌یه‌ک گۆرانیه‌کانی لا خۆش بوو هه‌رکاتێ له‌چێشتخانه‌ی ماڵێ خه‌ریکی نان ئاماده‌کردن بوایه‌ زۆر بڵند ده‌نگی ده‌دایه‌ له‌گه‌ڵی ده‌گۆته‌وه‌ : وه‌ی ده‌ردت له‌گیانم ... خه‌جیجێ مه‌جیجێ ، کیبڕا ئامین ، حه‌یشی فاتم ، نه‌سرین عه‌لاو ، تابان به‌یان ..... به‌له‌نجه‌ش‌ بۆی ده‌سوڕا و هه‌ڵده‌به‌زی ده‌سرۆکه‌ په‌شته‌ماڵێکی باده‌دا ده‌نگی لێوه‌ده‌هات : تاعهوووووو ، هۆی ها.

دڵشاد تاقانه‌



Dlshadtakana@yahoo.com