ناڕەزایەتیمان کرد تا بڕیاری هەڵوەشاندنەوەی دیپۆرتی پەنابەرانمان لە بەریتانیا ڕاگرت!
سوپاسنامەیەك بۆ تەواوی ڕێکخراوە پەنابەری و ئینساندۆست و چەپ و رادیکالەکان و یەکێتیە کرێکاریەکان، بۆ ئەو پەرلەمانتار و کەسایەتیانەی کە لەم هەڵمەتەدا هاوکارو هاوبەشمان بوون، بۆ هەموو ئەو ئازادیخوازانەی کە بەهەر ڕێگەیەك بووبێت لەم کەمپەینەدا هاوکارمان بوون و پەنابەران و کەسوکاریان تەنها جێنەهێشت !
بەرێزان!
دڵنیام ئێوە خۆتان چەند ڕۆژێکە ئاگادارن کە بەهۆی بڕیاری دیپۆرتکردنەوەی ژمارەیەك لە پەنابەرانی کوردزمان، چون و لە چ ئاستێکدا فیدراسێونی سەراسەری پەنابەرانی عێراقی لە مەیداندا ئامادەبووەو بەردەوام لە هەموو ڕێگەیەکی گونجاو و یاسایی و ناڕەزایەتی دەربڕینەوە لە هەوڵدابووە بۆ ڕاگرتنی ئەم بڕیارە دژی ئینسانیەی هۆم ئۆفیس، کە دەکرا بێتە هۆی نا ئومێدو کارەسات و رووداوێکی یەکجار خەمگین کە بەرۆکی بە دەیان خێزان گرتبوو کە بە دڵنیاییەوە هەر ئەمەش دواتر ڕێگەی خۆشدەکرد بۆ ئاساییکردنەوەی دیپۆرتی سەدان کەسی ترو ڕەنج خەسارکردنی هەموو ئەو کەسانەی کە ساڵەهای ساڵە بە قیمەتی قوربانیدانێکی یەکجار گەورە هاتوونەتە بەریتانیا و بەئومێدی ژیانێکی خۆشتر و دوور لە ستەم و سوکایەتی پێکردن و برسیکردن و بێکاکردن.
هەربۆیە ئەوەی کە ئێمە وەك فیدراسیۆن لەم هەفتەو دە رۆژەدا ئەنجامماندا راوەستانەوە دژ بە بڕیارەکە و ڕوو بەڕووبوونەوەی سیاسەتی دیپۆرتکردنەوەو هەڵوێست گرتن بوو دژ بە هوم ئوفیس و حکومەتی بەریتانیا، لەم ڕێگەشەوە لە پاڵ رێکخستنی خۆپیشاندان لە ناوخۆی کوردستان و لە بەریتانیا، جیاواز لە تۆمارکردنی سکاڵا لە رێکخراوی نەتەوە یەگرتووەکان و دادگای ئەوروپا بۆ مافەکانی مروڤ دژ بەم پێشڵکاریانەی حکومەتی بەریتانیا هاوکات دەیان حزب و رێکخراو و سەدان کەسایەتیمان ئاگادار کردەوە لەو هەنگاوە پڕ مەترسیەی کە ئەگەر رێ پێنەگیرایە دەبوو هەوێنی نائومیدیەکی گەورە لەنیو ریزی ئەو پەنابەرانەدا کە بە نرخی گیان لەدەستدانی سەدان هاوڕێ و دۆست و ئازیزان گەشتوونەتە ئەم وڵاتە !
کارێك کە ئێمە لەم هەفتەیەدا ئەنجامماندا هەڵخراندنی تواناو ئیبتکاری بەشێکی بەرچاو لە هەڵسوڕانی فیدراسیۆن و کەسانێك کە خۆیان بەشدارو هاوئامانج دەزانی لەم جوڵانەوەیەدا، بۆیە لە لایەکی تریشەوە هەروەک ئاگادارن بەردەوام لەرێگەی ڕاگەیاندو میدیاکانەوە ئێمە لە هەوڵی زیندو راگریتنی دۆخەکەو بەهێزکردنی جەمسەرێکی هەقخوازدابووین بۆ داکویکردن لەمافی پەنابەران، تا سەرئەنجام لە دواین چرکە ساتەکانی پینانە رۆژی سێ شەممە و جێ بەجێکردنی بڕیاری دیپۆرتکردنەوەی ئەو پەنابەرانەدا، هۆم ئوفیسی حکومەتی بەریتانیا بە فەرمی رایگەیاند کە دیپۆرتکردنەوەی پەنابەران هەڵدەپەسێرێت و گەشتەکە هەڵوەشێنراوەتەوە لە نێو گرتووخانەو زیندانەکاندا بەفەرمی پیانیان راگەیانبوون کە دیپۆرتەکەتان ڕاگیراوە!
بەرێزان
وەک هەموو لایەك ئاگادارن کە ئێمە وەک فیدراسیۆن لە رۆژی یەکەمەوە دژی ئەم هەوڵانەی هۆم ئۆفیس بەتووندی راوەستاینەوەو نایاسایی بوونی ئەم هەڵویستەمان راگەیاند و سەلماندمان. بۆیە دواجار خۆشحاڵانە لە دواین چرکەساتدا ئەم هەوڵی دیپۆرتە راگیرا و شکستی هێناو بەرەی ئێمەی پەنابەران و ئازادیخوازان سەرکەوتنێکی گەورەو پربایەخی بەدەستهێنا، کە ئەمەش تەنیا بەرهەمی یەکگرتوویی و هاتنەمەیدانمان بوو.
هەربۆیە لێرەوە روومان لە هەموو ئێوە یەك بەیەکی ئەو ڕێکخراو کەسایەتی و سیاستمەدارانەیە کە بەشێک بوون لەم هەوڵانە و بەدەم بانگەوازەکەی فیدراسیۆنەوە هاتن و هەڵوێستی جوامێرانەی خۆتان نیشانداو لەهەوڵێکی شایستەدا بوون بۆ هاوکاریکردنی ڕاگرتنی ئەم بڕیارەی هۆم ئوفیس دژ بە پەنابەران!
بۆیە دەستی هاوکاری و هاودڵی یەك بەیەکتان دەگوشین و ئێوە بە هاوکارو بەشدارێکی کارا دەزانین لە بەسەرکەوتن گەیاندنی کەمپینەکەمان و هیودارین ئەم ئەزموونە بەرز ڕاگرین و هەر کات و ساتێك ئەم بڕیارە جاریکی تر هێنرایەوە مەیدان بەتووندی لەبەرامبەریدا راوەستینەوە، چونکە ڕاگرتن و هەڵپەساردنی ئەم دیپۆرتکردنەوەیە هێشتا بەمانای هەڵوەشانەوەی کۆی رێکەوتنامەکە نیە، بەڵکو تەنیا ئەوەندەیە کە لە ئێستادا بۆ ماوەیەکی کاتی دیپۆرتکردنەوەی ئەم پەنابەرانەیان راگرتووە، بۆیە پێویستە هەمیشە ئامادەو لەپەیوەندیدا بین بۆ هەر جوڵەیەکی حکومەت و هێنانەوە مەیدانی ئەم بڕیارە، بۆیە تەنیا رێگە لەبەردەم ئێمەدا یەکگرتووی و گردبوونەوەمانە لە دەوری فیدراسیون و خۆرێکخراوکردنمانە بۆ شکست پێهێنانی تەواوی ئەم رێکەوتننامەیەی نێوان حکومەتی بەریتانیاوعێراق وهەرێم.
ماوەتەوە بڵێین هەنگاوەکانی تا ئێستا سەلماندی کە یەکیەتی و هاودڵی و یەکگرتنمان هەوێنی سەرکەوتن و بەدەستهێنانی مافەکانمانە، بۆیە دەبیت ئەم هەنگاوەی تا ئێستا وەك سەرکەوتنێکی گەورە بەرز بنرخێنین و رایگرین و هاوکات خۆمان ئامادەتر بکەین بۆ هەڵوەشانەوەی تەواوی رێکەوتننامەو بەدەستهینانی مافی پەنابەریمان!
جارێکی تر ئێمە وەك فیدراسیونی سەراسەری پەنابەرانی عێراقی سوپاس و ستایشی یەك بەیەکتان دەکەین بۆ هەموو هەوڵ و تەقەلاکانتان سەبارەت بە راگرتن و هەڵوەشاندنەوەی دیپۆرتی ئەمڕۆی پەنابەران بۆ هەولێر، ئەگەر بەشێوەیەکی کاتیش بووە، هەروەها هەر لێرەشەوە پیرۆزبایی وخۆشحالی خۆمان بۆ هەموو ئەو پەنابەرانە و کەسوکارو منداڵەکانیان رادەگەیەنین کە چەندین رۆژە لە دڵەراوکەو نیگەرانیەکی یەکجار گەورەدا بوون، پێیان دەڵێین کە تەنیا رێگەی ئێوە بۆ رزگاربوون لە تەوقی دیپۆرتکردنەوە یەکگرتووبوون و رێکخراوبوونتانە لە دەوری فیدراسیۆن دا، بۆ داکۆیکردن لەمافەکانتان!
سکرتاریەتی فیدراسیۆنی سەراسەری پەنابەرانی عێراقی
٣١/٥/٢٠٢٢
لەدرێژەی کەمپەینی فیدراسیۆنی سەراسەری پەنابەرانی عێراقی دژ بەدیپۆرتی پەنابەرانی کورد جیرمی کۆربن سەرۆکی پیشوی لیبەر پارتی ئەمرۆ ۳٠_٥_۲٠۲۲ سەبارەت بەبریاری دیپۆرتی پەنابەران نامەیەکی نارەزایەتی ئاڕاستەی وەزیری ناوخۆی بەرتانیاکرد زۆر بەتوندی دژی ئەم بڕیارە کتوپڕانەیە کە وەزارەتی ناوخۆ بەردەوامە لەسەر ئامادەکردنی بەتایبەتیش پرۆسەکە بەشێوەیەکی دڵڕەق بەڕێوەدەچێ.
داوا دەکات کە پەنابەرێک دەبێ پێشتر بە چ جەهەنەمێکدا تێپەڕیبێت پێش ئەوەی دەست بە پرۆسەی پەنابەری بکات. زۆر گرنگە بە شێوەیەکی ئینسانی بەرامبەر بە پەنابەران و پەناخوازان مامەڵە بکەین و بەردەوام نەبین لەسەرئەوەی بەزۆر پەنابەران بنێرینەوە گوایە لە کۆمەڵگایەکی خەمخۆر بۆ کۆمەڵگەیەکی تا ڕادەیەکی زۆر زبر.
دەقی نامەکە لەخوارەوە هاتووە:
بەڕێز پریتی پەتێڵ وەزیری ناوخۆ، لەندەن
بەڕێز وەزیری ناوخۆ نامەی هاوپێچ لەلایەن IFIR (فیدراسیۆنی سەراسەری پەنابەرانی عێراقی) زۆر باشتر لەوەی من بتوانم سەبارەت بە پلانی دیپۆرتکردنەوەی پەناهەندە بۆ هەولێر سبەی 31ی ئایار باسبکەم. ئەو ڕاستیانەی کە تێیان دەگەم ئەوەیە کە هەندێک لەو کەسانەی لەو دیپۆرتکردنەوەدا دەبن بەم شێوەیەی خوارەوەیە: •
هێشتا خەریکی پرۆسەی یاساییە و کێشەکەشی یەکلایی نەکراوەتەوە کەچی دەستگیرکراوە و هەورەها لەلایەن ستافی بنکەی دەستبەسەرکردن بە خراپی مامەڵەیان لەگەڵ کراوە (دڵنیام بابەتێکە پێویستە لێکۆڵینەوەی زیاتری تیابکرێ). • پێویستی پزیشکی جدییان هەیە کە تا ئێستا پشتگوێخراون. • خەڵکی هەولێر نین و لەوێ بەجێبهێڵرێن بێ هیچ پەیوەندی خێزانی و هاوڕێیەتی. • لێرە جێگیر بووە، پەیوەندی نزیک و فراوانیان بە خەڵک و خێزانەکانەوە هەیە و تیایاندایە هاوسەر، باوک و باپیر. • لە هەندێک حاڵەتدا لێرە لە دایک بوون و بە ناپێویستی لە ڕەگ ڕیشەوە هەلئەکەنرێن. جگە لەوەش، عێراق لە دۆخێکی ئاڵۆزی بەردەوامدایە بەهۆی شەڕی عێراقەوە و ئێمە بەرپرسیارێتییەکی بەرچاو لە ئەستۆماندایە لە بەرامبەر زەبر و زەنگی پەیوەندیدار بە هەر کەسێک لەوێ یا لە ناوچەکە دەژی. وەک گەلێکی چەوساوە، بە تایبەتی کۆمەڵگای کوردی تووشی تەنگانەیەکی بەردەوام و ترسناک بووە، ئێمەش قەرزاری ئەوانین کە دۆخی چارەسەرنەکراوەکەیان خراپتر نەکەین، زۆرێکیان بە درێژایی ژیانیان نەک جارێک بەڵکو دوو سێ جار هەڵاتوون. من بە توندی دژی ئەم گەشتە کتوپڕانەیەم کە وەزارەتی ناوخۆ بەردەوامە لەسەر ئامادەکردنی بەتایبەتیش پرۆسەکە بەشێوەیەکی دڵڕەق بەڕێوەدەچێ. داواتان لێدەکەم هەوڵ بدەن و بیخەنە بەرچاوتان کە پەنابەرێک دەبێ پێشتر بە چ جەهەنەمێکدا تێپەڕیبێت پێش ئەوەی دەست بە پرۆسەی پەنابەری بکات. زۆر گرنگە ئێمە بە شێوەیەکی ئینسانی بەرامبەر بە پەنابەران و پەناخوازان مامەڵە بکەین و بەردەوام نەبین لەسەرئەوەی بەزۆر پەنابەران بنێرینەوە گوایە لە کۆمەڵگایەکی خەمخۆر بۆ کۆمەڵگەیەکی تا ڕادەیەکی زۆر زبر.
هیوادارم ببیستم کە تۆ ئامادەیت چاو بە پلانەکانتدا بخشێنیتەوە.
لەگەڵ ڕێزم! جیرێمی کۆربن ئەندامی پەرلەمانی بەریتانیا
برۆکسیل؛٢٦-٥-٢٠٢٢:
لەنامەیەکدا کە وینەیەکی بەناوەندی هەوالگری فیدراسیۆن گەیشتوە دەشتی جەمال سکرتیری فیدراسیۆنی سەراسەری پەنابەرانی عێراقی سکاڵایەك ئاراستەی دادگای ئەوروپا بۆ مافەکانی مرۆڤ وڕێکخراوی نەتەوەیەگرتوەکان بۆ کاروباری پەنابەران دەکات سەبارەت راگرتنی ژمارەیەك لەپەنابەری کورد لەگرتووخانەدەستبەسەرەکانی بەریتانیا کە بریارە کۆتایی ئەم مانگە دیپۆرتی فرۆکەخانەی نیو دەولەتی هەولیر بکرینەوە.
لەنامەکەدا هاتووە” ئێمە بەفەرمی ئەم سکاڵایەتان ئاراستە دەکەین لەسەر وەزارەتی ناوخۆی بەریتانیا سەبارەت بەبریاری دیپۆرتکردنەوەی ژمارەیەکی زۆر لە پەنابەرانی کورد بۆ هەولیر لەبەرواری ٣١مەی ٢٠٢٢ داو لە ئیستەدا ١٥پەنابەر تیکتی بەزۆر ناردنەوەیان وەرگرتووە لە کاتێکدا زۆربەیان زیاتر لە ٢٠سالە لەولاتی بەریتانیا ژیانیان دامەزراندوەو خاوەنی ژنو مناڵن کە رەگەزنامەی بەریتانیان هەیە”
هەر لەنامەکەدا هاتووە”ئیمە بروامان وایە ئەم هەنگاوەی حکومەتی بەریتانیا بەدوای سەردان و دانیشتنی نێوان پریتی پاتێڵ وەزیری ناوخۆی بەریتانیاو مەسروبارزانی سەرۆکی حکومەتی هەرێمدا هاتۆتە ئاراوە “
لەکۆتای سکاڵاکەدا داوادەکات”دادگای ئەوروپا بۆ مافەکانی مرۆڤ ورێکخراوی نەتەوە یەکگترتووەکان بۆ کاروباری پەنابەران ناردنەوەی زۆرە ملی پەنابەرانی کورد ئیدانە بکەن وە حکومەتی بەریتانیا بەرپرس بکەن لەرێزگرتن لە پەیماننامە جیهانیەکان لەبارەی مافەکانی پەنابەران وبریاری جنیڤی ١٩٥١”
لە ئیستا زیاتر لە٤٠ پەنابەر کە زۆربەیان هاولاتی هەرێمی کوردستانن لەژمارەیەك لە گرتووخانەکانی بەریتانیا ڕاگیراون وابریارە دیپۆرتی فرۆکەخانەی نیو دەولەتی هەولیر بکرینەوە .فیدراسیۆنی سەراسەری پەنابەرانی عێراقی کەمپەینێکی راگەیاندوە لە پێناو بەرگرتن بەدیپۆرتی ئەو پەنابەرانە وئازادکردنیان.
بەریتانیا –لەندەن٢٤-٥-٢٠٢٢:
لەنامەیەکدا کە وینەیەکی بەناوەندی هەوالگری فیدراسیۆن گەیشتوە سەبارەت بە ڕاگرتن ودیپۆرتکردنەوەی پەنابەرانی کورد لە گرتووخانەکانی بەریتانیا ، دەشتی جەمال سکرتیری فیدراسیۆنی سەراسەری پەنابەرانی عێراقی پریتی پاتیل وەزیری ناوخۆی بەریتانیا بەرپرس دەکات لە ئەمنیت وسەلامەتی ژیانی ئەو پەنابەرانەی کە بریارە کۆتایی ئەم مانگە دیپۆرتی فرۆکەخانەی نیو دەولەتی هەولیر بکرێنەوە.
لەنامەکەدا هاتووە”داواتان لیدەکەم چاوبخشیننەوە بەو بریارەی داوتانە و دەستبەجێ دیپۆرتی ئەو پەنابەرانە راگرن و ئازادیان بکەن ولەمافی پەنابەری بەهرەمەندیان بکەن وکۆتای بەورێکەوتنەتان بهینن کە لەگەل دەسەلاتدارانی کوردستان کردوتانە”
هەر لەنامەکەداهاتووە”ئەو پەنابەرانەی ئیوەدەستگیرتانکردون ژنومنالیان هەیە ومافی پێکەوژیانیان هەیە لەبەریتانیا ،ێیویستە حکومەتی بەریتانیا ڕێز لەمافەکانی پەنابەران بگرێت وپابەند بێت بەبریاری نیو دەولەتیەکان لەباری مافەکانی پەنابەرانەوە”
لە ئیستا دا زیاتر لە ٤٠ پەنابەر کە زۆربەیان هاولاتی هەرێمی کوردستانن لەژمارەیەك لە گرتووخانەکانی بەریتانیا ڕاگیراون وابریارە دیپۆرتی فرۆکەخانەی نیو دەولەتی هەولیر بکرینەوە .فیدراسیۆنی سەراسەری پەنابەرانی عێراقی کەمپەینێکی راگەیاندوە لە پێناو بەرگرتن بەدیپۆرتی ئەو پەنابەرانە وئازادکردنیان.
دەقی وینەی نامەکە بەزمانی ئینگلیزی هاوپێچە
چاوەروانی هەواڵی زیاتر بن.
لەندەن-گرتووخانەی هارموندسورس٢٠٢٢:
نەژاد یەکیك لەو پەنابەرە کوردانەی لە گرووخانەی دەستبەسەری هارموندسورس راگیراوە بە ناوەندی هەواڵگری فیدراسیۆنی ڕاگەیاند”تەنها لەم گرتووخانەی ئێمە تائیستا ١٤ پەنابەر تیکتیان پێداون کە ٣١ئەم مانگە دیپۆرتی فرۆکەخانەی نیو دەوڵەتی هەولیرمان بکەنەوە”
بانگەوازێك لە فیدراسیۆنی پەنابەرانەوە: بەشداربن لە خۆپیشاندانی ناڕەزایەتی دژ بەناردنەوەی زۆرەملێی پەنابەران بۆ کوردست
رۆژی سێ شەممە: ٢٤/٥/٢٠٢٢
کاتژمێر: ٢ی پاشنیوەرۆ
شوێن: بەردەم وەزارەتی ناوخۆ لەلەندەن
2 Marsham St, London SW1P 4DF
نزیکترین ئیستگای قیتار: Westminster Station and St. James’s Park
لەندەن-گرتووخانەی هارموندسورس٢٠٢٢:
پەنابەرێکی کورد لە گرووخانەی دەستبەسەری هارموندسورس نزیك فرۆکەخانەی هیسرۆ لە لەندەن بە ناوەندی هەواڵگری فیدراسیۆنی ڕاگەیاند”دۆینی لەکاتی ئیمزاکردنی پۆلیس دەستگیریانکردم وتیکتیان پێداوم کە ٣١ئەم مانگە دیپۆرتی فرۆکەخانەی نیو دەوڵەتی هەولیرم بکەنەوە”
ئەو پەنابەرە ئەوەشی ووت”خاوەنی خێزان وچوار منالەم وە ٢١سالە لە ولاتی بەریتانیا ژیان دەکەم ،نامەوێت لەخێزان ومنالەکانم دابڕیم”
هەروەها ووتیشی ” داوا دەکەم کاربەدەستیانی فرۆکەخانەی هەولێر وەرمان نەگرنەوە بەخاتری رازیکردنی دلی حکومەتی بەریتانیا ژینمان لی تێك نەدەن ، ئێمە لیرە ژیانمان دامەزراندوە وگەرانەوەمان زۆرە ملییە نەك ئارەزوومەندانە “
لەپەیوەندیەکی تەلەفونی ناوەندی هەواڵگری فیدراسیۆن لەگەڵ دەشتی جەمال سکرتێری فیداسیۆنی سەراسەری پەنابەرانی عێراقی سەبارەت بە ناردنەوەی ئەو پەنابەرەو هەوڵەکانی فیدراسیۆن ووتی”ئەگەر چی ماوەی چەند سالە گیرانەوەی زۆرەملی پەنابەران بەرهەمی هەولەکانی فیدراسیۆن ڕاگیرابوو، بەلام بەداخەوە وادیارە سەردانەکەی ئەم دواییانەی مەسروربارزانی سەرۆکی حکومەت و وەفدی یاوەری زیاتر بووە لە گریبەستی غازو نەوت وبەتاڵانبردنی داهاتوسامانە سروشتیەکانی کوردستان، ئەم جارە دانیشتەکەیان لەگەل پریتی پاتیل وەزیری ناوخۆ سیاسەتی بەزۆر ناردنەوەی پەنابەرانی لێکەوتۆتەوە”
دەشتی ئەوەشی ووت” ئەو هەڵومەرجە سەختەی ژیانکردن لە کوردستان بەشێک لە هاولاتیانی ناچارکردوە بەهەزارویەک دەردەسەری ونارەحەتی خۆیان بگەیەننە ولاتانی ئەوروپا بەڵام لیرەش ئەوە حکومەتی هەرێمی کوردستان وحزبەکانێتی کە دەست لەیەخەی هاولاتی رزگاربووی ژیر سایەی دەسەلاتە سەرکوتگەریەکەیان ناکەنەوە و ساتو سەوداوبازرگانی بەژیانی پەنابەرانەوە دەکەن . هەربۆیە پیویستە پەنابەران بەهێزی ریکخرابوونیان ئەم سیاسەتە دژی مرۆیە پوچەڵ بکەنەوەو سەرانی ئەو حکومەتە لەدەرەوە بدەنە بەرنەفرەت ونارەزایەتی”
دەشتی ووتیشی” ئێمە تەواوی هەولەکانی خۆمان لەدەرەوەو ناوەوەی کوردستان خستۆتە گەر بۆ راگرتنی ئەو سیاسەتە قیزەوەندو ئازادکردنی ئەو پەنابەرانە لە گرتووخانەکانی بەریتانیا .داواش لە خەڵکی ئازادیخوازو مرۆڤ دۆست وڕێکخراوەی داکۆکیکارلە پەنابەران دەکەین لە ئاست ئەم سیاسەتە دژی مرۆییەی حکومەتی هەرێمی کوردستان وحکومەتی بەریتانیا بیدەنگ نەبن وسنورێك بۆسیاسەتی دیپۆرتی پەنابەران دابنیێن”
لە ئیستەدا لە گرتووخەنەی دەستبەسەری هارموندسورس لەلەندەن پێنج پەنابەری کورد راگیراون وبریارە پێچەوانە بەخواستی خۆیان دیپۆرتی فرۆکەخانەی نیو دەوڵەتی هەولێرو سلێمانیان بکەنەوە.
